பிரபல கிரிக்கெட் வீரர் ஓய்வு அறிவித்தார்!

தினேஷ் கார்த்திக் 2004ஆம் ஆண்டிலேயே இந்திய அணிக்கு அறிமுகமானார். இருப்பினும், இவருக்கு ரெகுலராக இடம் கிடைக்கவில்லை.

குறிப்பாக, மகேந்திரசிங் தோனி வந்த பிறகு தினேஷ் கார்த்திக்கின் இடம் மொத்தமாக பறிபோனது. 2007ஆம் ஆண்டு டி20 உலகக் கோப்பை தொடரில் கோப்பை வென்ற அணியில் தினேஷ் கார்த்திக் இடம்பெற்ற நிலையில், அடுத்து தோனிக்கு நிரந்தர கேப்டன் பதவி கொடுக்கப்பட்டதால், விக்கெட் கீப்பர் பேட்டர் தினேஷ் கார்த்திக் ஓரங்கட்டப்பட்டார்.

ஐபிஎல் கேப்டன்:

அடுத்து குடும்ப பிரச்சினைகள் காரணமாக, சில ஆண்டுகள் கிரிக்கெட்டில் இருந்து விலகியிருந்த அவர், மீண்டும் ஐபிஎல் தொடர் மூலம் கம்பேக் கொடுத்தார். டெல்லி, மும்பை, பெங்களூர் அணிகளுக்காக விளையாடி, பிறகு கொல்கத்தா நைட் ரைடர்ஸ் அணிக்கு கேப்டனாகவும் செயல்பட்டார். இதனால், 2019ஆம் ஆண்டில் நடைபெற்ற ஒருநாள் உலகக் கோப்பை தொடரில் தினேஷ் கார்த்திக்கிற்கு வாய்ப்பு கிடைத்தது. அதன்பிறகு பார்ம் அவுட் ஆனதால், ஐபிஎலிலும் அவ்வபோது மட்டுமே லெவன் அணியில் இடம்பெற்று விளையாடி வந்தார்.

தினேஷ் கார்த்திக் லட்சியம்:

தொடர்ந்து கிரிக்கெட் வர்ணனை பணியையும் அவர் செய்து வந்ததால், விரைவில் ஓய்வினை அறிவிப்பார் என எதிர்பார்க்கப்பட்டது. அப்போது பேட்டிகொடுத்த தினேஷ் கார்த்திக், ‘‘நான் ஐபிஎலில் சிறப்பாக விளையாடி மீண்டும் இந்திய அணிக்கு நிச்சயம் திரும்புவேன். 2022ஆம் ஆண்டில் நடைபெறவுள்ள டி20 உலகக் கோப்பை தொடர்தான் எனது இலக்கு’’ எனக் கூறினார். தினேஷ் கார்த்திக்கின் இந்த பேட்டியை பலரும் கலாய்த்து வந்தார்கள்.

ஆனால், தினேஷ் கார்த்திக் சொன்னது போல ஐபிஎல் 15ஆவது சீசனில் ஆர்சிபி அணிக்காக பெஸ்ட் பினிஷராக செயல்பட்டு, டி20 உலகக் கோப்பை அணியிலும் இடம் பிடித்து அசத்தினார். இனி இந்திய அணியில் இளம் வீரர்களுக்குத்தான் அதிக வாய்ப்புகள் கொடுக்கப்படும் என்பதால், தினேஷ் கார்த்திக்கிற்கு இடம் கிடைப்பது மிகமிக கடினம்தான்.

தினேஷ் கார்த்திக் ஓய்வு?

இந்நிலையில் தற்போது, இன்ஸ்டாகிராம் பக்கத்தில் வீடியோ ஒன்றை வெளியிட்டுள்ள தினேஷ் கார்த்திக், அதில், ‘‘டி20 உலகக் கோப்பை தொடரில் விளையாட வேண்டும் என்ற நோக்கில் கடுமையாக உழைத்தேன். அப்படி செய்தது பெருமையான உணர்வை தந்தது. உலகக் கோப்பையில் கடுமையாக போராடி, கடைசி கட்டத்தில் வீழ்ந்தோம். ஆனாலும், அது எனது வாழ்க்கையில் மறக்க முடியாத பல நினைவுகளை தந்துள்ளது. பயிற்சியாளர், சக வீரர்களுக்கு நன்றி’’ எனப் பதிவிட்டுள்ளார்.

இதன்மூலம், தினேஷ் கார்த்திக் சர்வதேச கிரிக்கெட்டில் ஓய்வுபெற்றுவிட்டதாகத்தான் கருதப்படுகிறது. இருப்பினும், ஐபிஎலில் அவர் தொடர்ந்து பங்கேற்பார் என தகவல் வெளியாகியுள்ளது. 2004ஆம் ஆண்டில் இந்திய அணிக்கு அறிமுகமான தினேஷ் கார்த்திக் 25 டெஸ்ட், 94 ஒருநாள், 65 டி20 போட்டிகளில் விளையாடியிருக்கிறார்.

தினேஷ் கார்த்திக் மீண்டும் வர்ணனை பணிக்கு திரும்ப உள்ளார் என ஸ்கை ஸ்போர்ட்ஸ் நிறுவனம் அறிவித்துள்ளது.