தூத்துக்குடியில் வரும் 23ஆம் தேதி புத்தக திருவிழா!

தூத்துக்குடி :

பள்ளி மாணவ மாணவிகள் புத்தக கண்காட்சியை பார்வையிட சிறப்பு பேருந்து வசதிகள் செய்யப்பட்டுள்ளதாக கனிமொழி கூறியுள்ளார்.

தூத்துக்குடியில் வரும் 23ஆம் தேதி முதல் 29ஆம் தேதி புத்தக திருவிழா நடைபெற உள்ளது. புத்தகத் திருவிழா நடைபெறும் இடத்தை தூத்துக்குடி பாராளுமன்ற உறுப்பினர் கனிமொழி கருணாநிதி நேரில் பார்வையிட்டார்.

தூத்துக்குடி மாவட்டத்தில் கடந்த மூன்று ஆண்டுகளாக புத்தகத் திருவிழா நடத்தப்பட்டு வருகிறது. இதில் இந்தியா முழுவதும் உள்ள தலைசிறந்த எழுத்தாளர்களின் படைப்புகள் மற்றும் சிறந்த பதிப்பகங்களின் புத்தகங்கள் கண்காட்சி மற்றும் விற்பனைக்காக காட்சிப்படுத்தப்பட்டு வருகிறது. இந்த ஆண்டுக்கான புத்தகத் திருவிழா தூத்துக்குடி எட்டையாபுரம் சாலையில் உள்ள தனியார் திருமண மண்டபத்தில் நடைபெற உள்ளது.

புத்தகத் திருவிழா நடைபெறும் இடத்தை தூத்துக்குடி பாராளுமன்ற உறுப்பினர் கனிமொழி கருணாநிதி, சமூக நலன் மற்றும் மகளிர் உரிமைத் துறை அமைச்சர் கீதா ஜீவன், மேயர் ஜெகன் பெரியசாமி, மாவட்ட ஆட்சித் தலைவர் டாக்டர் செந்தில்ராஜ், மற்றும் அதிகாரிகள் இன்று நேரில் பார்வையிட்டனர்.

பின்னர் செய்தியாளர்களைச் சந்தித்த கனிமொழி, “தூத்துக்குடி மாவட்டத்தில் வரும் 23ஆம் தேதி முதல் 29ஆம் தேதி வரை புத்தகத் திருவிழா நடைபெற உள்ளது. இதில் இந்தியாவில் உள்ள பிரபல எழுத்தாளர்களின் படைப்புகள் மற்றும் சிறந்த பதிப்பகங்களின் புத்தகங்கள் 70 அரங்குகள் அமைக்கப்பட்டு விற்பனை மற்றும் கண்காட்சிகள் நடைபெற உள்ளது.

பள்ளி மாணவ மாணவிகள் புத்தக கண்காட்சியை பார்வையிட சிறப்பு பேருந்து வசதிகள் செய்யப்பட்டுள்ளது. மேலும் இந்த புத்தக கண்காட்சியில் தலைசிறந்த பேச்சாளர்கள் பட்டிமன்றம் மற்றும் மாணவ, மாணவிகளுக்கு அறிவுத்திறனுக்கான போட்டிகளும் நடத்தப்படும்” என கூறினார்.