என்ன தலைவரே அவசர பட்டுட்டிங்க!

மக்களவைத் தேர்தலைப் பொறுத்தவரை பாஜக மிகப் பொறுமையாக எல்லா பக்கத்தையும் பார்த்துதான் முடிவு எடுக்கும். ஓபிஎஸ் எவ்வளவு இறங்கிச் சென்றாலும் அதற்கு இம்முறை பலன் இருக்காது என்கிறார்கள்.

மக்களவைத் தேர்தலில் மெகா கூட்டணி அமைத்து போட்டியிட்டு திமுகவை வீழ்த்துவோம் என கடந்த வாரம் எடப்பாடி பழனிசாமி பேசியிருந்தார். எடப்பாடி சொல்லும் மெகா கூட்டணியில் யார் யார் இணைவார்கள் என்ற விவாதம் அப்போதே எழுந்தது. டிடிவி தினகரனின் அமமுகவை கூட்டணிக்கு அழைக்கிறார் என்றே அதிமுக வட்டாரத்திலேயே பேசப்பட்டது. ஆனால் கூட்டணி குறித்து எடப்பாடி பழனிசாமி வேறொரு முடிவெடுக்கப் போகிறார் என்கிறார்கள்.

அணிகள் இணைப்புக்கு வாய்ப்பு இல்லையா?

திமுகவை எதிர்த்து அரசியல் செய்ய எந்த கட்சிகளுடனும் கூட்டணி வைக்கலாம் என்ற முடிவில் தான் எடப்பாடி பழனிசாமி இருக்கிறார். அதனாலே டிடிவி தினகரனுக்கு கூட அவர் தரப்பு கிரீன் சிக்னல் கொடுக்க தயாராக உள்ளது. ஆனால் அதிமுகவில் அணிகள் இணைப்பு என்பது மட்டும் கூடவே கூடாது என்பதில் தெளிவாக இருக்கிறாராம்.

பாஜக என்ன நினைக்கிறது?

கட்சியின் பெரும்பாலான தொண்டர்கள், நிர்வாகிகள் கைவிட்ட நிலையில் ஓ.பன்னீர் செல்வம் டெல்லியில் லாபி செய்து அணிகள் இணைப்பை நடத்திவிட வேண்டும் என பல விதங்களில் முயற்சி செய்கிறார். பாஜகவும் ஒருங்கிணைந்த அதிமுக தான் பலம் என நினைக்கிறது. அப்போது தான் மக்களவைத் தேர்தலில் குறிப்பிடத்தக்க இடங்களாவது ஜெயிக்க முடியும் என்று நினைக்கிறது.

எடப்பாடியின் எண்ணம் என்ன?

மக்களவைத் தேர்தல் வெற்றி அதிமுகவைவிட பாஜகவுக்கு முக்கியமானது என்பதில் மாற்றுக்கருத்து இல்லை. ஆனால் அதற்காக ஓபிஎஸ்ஸை மீண்டும் கட்சிக்குள் கொண்டுவரத் துடிக்கும் பாஜக குரலுக்கு செவிகொடுக்க கூடாது என எடப்பாடி பழனிசாமியிடம் அவரது ஆதரவாளர்கள் கூறியுள்ளனர். எடப்பாடியின் எண்ணமும் அதுதான் என்கிறார்கள்.

எடப்பாடிக்கு எவ்வளவு ஆதரவு?

ஆட்சியைக் காப்பாற்றிக்கொள்ள பாஜகவின் துணை தேவையாக இருந்தது, எனவே அப்போது இறங்கிப் போனது போல் இப்போது போக தேவையில்லை. அதுமட்டுமல்லாமல் மக்களவைத் தேர்தல் பாஜகவுக்கு முக்கியமானது என்பதால் அவர்களும் பொறுமையாக தான் முடிவெடுப்பார்கள். ஓபிஎஸ் உடன் யார் நிற்கிறார்கள், எடப்பாடிக்கு எவ்வளவு ஆதரவு இருக்கிறது என்பது டெல்லிக்கு தெரியாமல் இல்லை. எனவே இம்முறை எடப்பாடி பழனிசாமியின் வாய்ஸ் டெல்லியில் எடுபடும் என்கிறார்கள்.

யூ டர்ன் போட்ட தினகரன்: பாஜகவுக்கு காத்திருந்த அதிர்ச்சி!

ஒருவேளை பாஜக ஓபிஎஸ் இணைப்பை வலியுறுத்தினால் கூட்டணியிலிருந்து விலகவும் எடப்பாடி பழனிசாமி தயாராக இருப்பதாக சொல்கிறார்கள். பாஜகவை விட்டு வந்தால் திமுக கூட்டணியில் இருப்பவர்கள்கூட அதிமுகவை நோக்கி வர வாய்ப்புள்ளது என்று கூறுகிறார்கள் அரசியல் நோக்கர்கள். எனவே எடப்பாடி பழனிசாமி மிகவும் ரிலாக்ஸாக ஓபிஎஸ் பிரச்சினையை டீல் செய்வார் என்கிறார்கள்.