மீனவர்கள் விடுதலை செய்யப்பட்டு வீடு திரும்பினார்!

நாகப்பட்டினம் : 

கடந்த பிப்ரவரி 23ம் தேதி இலங்கை கடற்படையினரால் கைது செய்யப்பட்ட தமிழகம் மற்றும் காரைக்கால் மீனவர்கள் 22 பேர் புதன்கிழமை விடுவிக்கப்பட்டனர்.

22 மீனவர்களில் 12 பேர் நாகப்பட்டினம் மாவட்டத்தையும், 5 பேர் மயிலாடுதுறை மாவட்டத்தையும், 5 பேர் காரைக்கால் மாவட்டத்தையும் சேர்ந்தவர்கள். பிப்ரவரி 22 அன்று நாகப்பட்டினம் மற்றும் காரைக்கால் மீன்பிடித் துறைமுகங்களில் இருந்து புறப்பட்ட இரண்டு விசைப்படகுகளில் அவர்கள் இருந்தனர். மீனவர்கள் கோடியக்கரைக்கு தெற்கே இருந்ததால், சர்வதேச கடல் எல்லைக் கோட்டை (IMBL) தாண்டியதாகக் கூறி இலங்கை கடற்படை அவர்களைக் கைது செய்தது.

கடற்படையினர் மீனவர்களை மயிலிட்டி மீன்பிடி துறைமுகத்திற்கு அழைத்துச் சென்று, யாழ்ப்பாணம் ஊர்காவற்றுறை நீதவான் முன்னிலையில் ஆஜர்படுத்தினர். பின்னர் அவர்கள் பத்து நாட்கள் நீதிமன்ற காவலில் வைக்கப்பட்டு யாழ்ப்பாணம் சிறையில் அடைக்கப்பட்டனர். இவர்களின் காவல் மார்ச் 10-ஆம் தேதி வரையிலும், பின்னர் மார்ச் 23-ஆம் தேதி வரையிலும் நீட்டிக்கப்பட்டது.

புதன்கிழமை, மாஜிஸ்திரேட் அவர்களின் சிறைத்தண்டனையை நிறுத்தி வைத்து, விடுதலை செய்ய உத்தரவிட்டார். எனினும் மீண்டும் இலங்கை கடற்பரப்பில் மீன்பிடித்தால் சிறைத்தண்டனை அனுபவிக்க நேரிடும் என மீனவர்களுக்கு எச்சரிக்கை விடுக்கப்பட்டுள்ளது.

மீனவர்கள் கொழும்பில் உள்ள இந்திய துணைத் தூதரகத்தில் ஒப்படைக்கப்படுவார்கள் என்றும், அடுத்த சில வாரங்களில் கோவிட்-19 நெறிமுறையை முடித்த பின்னர் அவர்கள் திருப்பி அனுப்பப்படுவார்கள் என்றும் அதிகாரிகள் தெரிவித்தனர்.

இலங்கை கடற்பரப்பிற்குள் அத்துமீறி நுழைந்த குற்றச்சாட்டின் பேரில் கடற்தொழில் மற்றும் நீரியல் வள திணைக்களத்தினால் குறித்த படகுகள் சிறைபிடிக்கப்பட்டுள்ள நிலையில், படகுகள் இலங்கையிலேயே தங்கியிருக்க வாய்ப்புள்ளது.