Apple ஐபோன் 14 சீரீஸை அறிமுகம் செய்த ஆப்பிள்!

ஆப்பிள் நிறுவனத்தின் புதிய 14 சீரீஸ் ஐபோன் உள்ளிட்ட சாதனங்கள் அறிமுகம் செய்யப்பட்டுள்ளன.

அமெரிக்காவின் கியூபர்டினோ நகரில் நடைபெற்ற நிகழ்ச்சியில் ஆப்பிள் நிறுவனத்தின் தலைமை செயல் அதிகாரி டிம் குக் புதிய சாதனங்களை அறிமுகம் செய்துவைத்தார். ஐ-போன் 14 சீரிஸ் ரகத்தில் மொத்தம் 5 வகை போன்கள் வெளியாகியுள்ளன. ஐபோன் 14 -ன் தொடக்க விலை 79 ஆயிரத்து 900 ரூபாய் ஆகும்.

ஐபோன்(iphone) 14 பிளஸ் – ன் தொடக்க விலை 89 ஆயிரத்து 900 ரூபாய் என்றும் ஐபோன் 14 புரோ-வின் தொடக்க விலை ஒரு லட்சத்து 29 ஆயிரத்து 900 ரூபாய் என்றும் அறிவிக்கப்பட்டுள்ளது. ஐபோன் 14 புரோ மேக்ஸ் -ன் தொடக்க விலை ஒரு லட்சத்து 39 ஆயிரத்து 900 ஆகும். இதன் அதிகபட்ச விலை 1,89,900 ஆகும்.

ஐபோன் 14 ரக செல்போன்கள் வரும் 16-ம் தேதி முதல் விற்பனைக்கு வர உள்ளது. இந்த போன்களில் அவசர காலத்திற்கு செயற்கைக்கோள் வழி அழைப்புகளை செய்ய முடியும் என்பது குறிப்பிடத்தக்கது. அமெரிக்கா மற்றும் கனடாவில் உள்ளவர்கள் 2 ஆண்டுகளுக்கு இச்சேவையை இலவசமாக பெற முடியும்.

இதுபோல் ஆப்பிள் ஸ்மார்ட் வாட்ச் எஸ்.இ.(SE) ரகத்தில் மொத்தம் 8 நிறங்கள் அறிமுகப்படுத்தப்பட்டுள்ளன. இந்த ஸ்மார்ட் வாட்ச்களின் விலை 29 ஆயிரத்து 900 ரூபாய் என அறிவிக்கப்பட்டுள்ளது. ஆப்பிள் ஸ்மார்ட் வாட்ச் சீரிஸ்-8 ரகத்தின் தொடக்க விலை 45 ஆயிரத்து 900 ரூபாய் என தெரிவிக்கப்பட்டுள்ளது.ஆப்பிள் ஏர்பட்ஸ் ப்ரோ- 2 என பெயரிடப்பட்டுள்ள ஏர்பட்ஸ்களின் விலை 26 ஆயிரத்து 900 என்றும் டிம் குக் அறிவித்தார்.